Juvel farin á trúboðaraferð til Grønlands
Um trítíðina í dag, loysti trúboðaraskipið Juvel frá kei í Klaksvík. Kósin varð sett vestur um hav til Grønlands har skipið og manningin fara á eina trúboðaraferð til býir og bygdir í Grønlandi.
Karstin Hansen sigur í hesum sambandi, at 9 fólk eru við skipinum vestureftir. Vit plaga at rokna umleið 7 dagar til túrin av Klaksvík og til Nuuk. Sjálvur fari eg eisini til Grønlands og rokni við at vera í Nuuk tá Juvel kemur har. Kvartettin í Betesta og tónleikararnir, Jógvan Mortensen og Erland Frederiksberg koma eisini til Grønlands og lenda eftir ætlan har, dagin eftir at Juvel, eftir ætlan, er komin til Nuuk.
Her blíva so nøkur møtir hildin saman við samkomuni í Nuuk. Tá tað er liðugt, verður fari víðari úr Nuuk og til allar bygdirnar á leiðini norður til Sisimiut, har møtir eisini verða hildin.
Í Sisimiut verður eitt ávíst útskifti av manning, har nøkur fara heim og onnur koma yvir til Grønlands. Síðani verður hildið áfram norður til Thule. Siglt verður síðani aftur til Nuuk og nýggja manningin vitjar bygdirnar í Suðurgrønlandi og fer eisini a vitjan í seks ella sjey plássum í Eysturgrønlandi. Norðasta plássið er Skorsbysund, men tað er ikki so lætt at klára tað eisini, tí tá er so langt útligið, at veðrið ikki altíð er til vildar. Tá vitjanin hjá Juvel er komin har norður eru umleið fýra mánaðar gingnir síðani skipið fór av Klaksvík, tá verður siglt aftur til Føroya.