Er kuril á tráðnum í samgonguni?
Hóast ført hevur verið fram, at bæði málini um hægri pensjónsaldur og Suðuroyartunnil koma fyri til 2. viðgerð á Løgtingi ”seinni í hesi vikuni”, so sær út til, at tað ikki verður so. Hvørki málið stendur á skránni fyri hósdagin 19. februar, og ongin tingfundur er sambært skránni fríggjadagin.
Eftir hvat Norðlýsið skilir, koma málini fyri í komandi viku, men tað sama varð sagt um, at tey komu fyri í hesi vikuni. Løgmaður hevur gjørt greitt, at stórur vandi er fyri, at samgongan slitnar, um bæði málini ikki verða samtykt, og tískil er eitt ávíst trýst á samgongutingfólkum. Hetta kann vera orsøkin til, at málini draga út.
Málini skuldu bæði hava 2. viðgerð í hesi vikuni. Dagurin í dag, 18. februar, var enda-dagfestingin fyri longdu freistini, sum Fíggjarnevndin fekk at skriva álit í.