Valskráin eitur ”Vel vit og skil”, og í henni stendur, at flokkurin fer at arbeiða fyri nógv fleiri bústøðum í Føroyum, fólkavøkstri og búskaparvøkstri, tjóðarsemjuni um at gerast eitt sjálvstøðugt land, og at fleiri krøv skulu setast til útlendingar, sum annars eru vælkomnir, stendur m.a. at lesa. Flokkurin er eisini ímóti dupultfunktiónum, stendur í valskránni.

Verður kavað so djúpt niður, sum til ber í eini so stuttari valskrá, so sæst eisini, at hámark skal setast fyri almennum, fyrisitingarligum størvum, at rentustuðulin skal niðurlagast, og millum nýggju vinnuvegirnar hjá Føroyum verður eitt nú nevnd rúmdarvinna. Eisini ætlar flokkurin at bora eftir olju, gassi og mineralum.

Eins og Tjóðveldi sigur Framsókn hetta vera seinasta fólkatingsvalið, men munurin er, at Framsókn ikki stillar upp til tað. Hanna Jensen og Sólvit E. Nolsøe stilla ikki upp aftur til løgtingsvalið, men annars stilla bæði forkvinnan Ruth Vang og løgtingslimurin Bjarni Kárason Petersen, umframt teir báðir varalimirnir Árni M. Dam og Karlot Hergeirsson, ið hava verið inni styttri og longri tíðarskeið, tá innvaldu tinglimirnir hava verið í farloyvi. 14 fólk stilla upp hesa ferð í mun til 17 til seinasta løgtingsval. 

Í 2022 stillaði Framsókn upp til fólkatingsvalið, men fekk bert 936 atkvøður. Tað vóru 64 atkvøður ov stutt til at kunna fáa stuðul úr statskassanum upp á 35 (nú 37) krónur pr. atkvøðu. Hámarkið er seinni (2024) broytt til 500 atkvøður. 

Øll valskráin hjá Framsókn kann lesast her