Eitt lágtrýst fer at liggja yvir bretsku oyggjunum fyrra partin av vikuni. Tað fer at senda lýggja luft ímóti Føroyum eystaneftir og av landsynningi. Vestanfyri er hetta ikki so gali, men eystanfyri kunnu vit rokna við mjørka.

Hósdagin og fríggjadagin er lágtrýstið farið eystureftir, og so fara vit at hava eitt luftrák av útnyrðingi ella vestri. Tað er betri ætt eystanfyri enn tað er vestanfyri.

Niðanfyri er forsøgn fyri veðrið til og við fríggjadagin. 5 dagar eru langt at fara fram í tíðina at spáa um veðrið. Tað skal lítið til, at forsøgnin ikki heldur. Váða vit okkum allíkavæl fram til leygardagin eisini, so fer hann at liggja av útsynningi, 3 til 8 m/s. Tað skuldi verið gott veður til bæði kappróður og soleiðis yvirhøvur at halda norðoyastevnu.

Vit fáa at síggja....

Veðrið í vikuni – dag fyri dag:

Mánadagin:

Hann fer at liggja av eystri ella beint oman fyri eystan. Ikki nógvur vindur, 3 til 8 m/s, sum fyrrapartin minkar niður í eitt lítið lot, minni enn 5 m/s. Skýloftið verður eitt sindur av hvørjum, tí tað verður nakað skiftandi, og við ættini í huga er møguleiki fyri mjørka í støðum eystantil. Tað verður turt fyri tað mesta, tó kanska okkurt ælið í støðum. Hitin fer at liggja millum 8 og 10 stig.

Týsdagin:

Týsnáttina gongur hann niður í landsynning ella sunnan, framvegis lítil vindur, minni enn 5 m/s, aftur skiftandi skýloft og okkurt ælið. Eitt lítið sindur lýggjari enn dagin fyri, millum 11 og 8 stig.

Mikudagin:

Mikudagin fer at vera eitt lítið lot av ymsum ættum, minni enn 5 m/s. Út á dagin útnyrðingur ella norðan. Smá- ella hálvskýggjað og yvirhøvur turt. Hitin fer at liggja millum 8 og 13 stig.

Hósdagin:

Ættin fer at liggja millum útnyrðing og vestan, um 5 m/s ella so. Um kvøldið og náttina útsynningur. Smá- ella hálvskýggjað og yvirhøvur turt. Tó okkurt ælið um kvøldið. Hitin millum 8 og 13 stig.

Fríggjadagin:

Um vestan, 3 til 8 m/s, skýggjað ella hálvskýggjað og yvirhøvur turt. Hitin 8 til 13 stig.