Hetta reinsiverkið hevur ikki virkað eftir vild, kanska eisini tí, at ov nógv yvirfletuvatn er leitt í tað, heldur enn bert kloakkvatn. Tí hevur nógv tey seinnu árini verið uppá tal at dagføra reinsiverkið her.

Tað verður so gjørt av kommununi nú, har ein stórur glastrevjatangi, sum vigar um 4 tons, skal gravast niður omanfyri vegin Niðri í Gili – omanfyri verandi reinsiverk.

Í løtuni grava teir nýggja leiðing fram við teirri gomlu – heilt frá sjóvarmálanum, sum so skal leggjast niðanum verandi veg og íbindast tað nýggja reinsiverkið har.

Hetta reinsiverkið tekur um 85 m3 – hevur fimm kømur, sum reinsa kloakkvatnið, er um 14 m langt. So tað tekur nakað av plássi.

Seinni skal leiðingin frá reinsiverkinum leiðast nakað væl út á sjógv – góðar 100 m.

Hetta nýggja reinsiverkið fer at avlasta tað gamla, sum tó skal verða í nýtslu eisini.

Tað hava nógv tey seinnu árini verðið gjørdar munandi dagføringar á kloakkirnar og nøkur reinsiverk í býnum, sum eisini hevur kostað hópin av peningi.

Men hetta hevur verið mett neyðugt og hevur verið gjørt í tráð við eina neyvt lagda dagførandi spillvatnsætlan, sum er løgd í samráð við myndugleikarnar.