Javnan verður umrøtt, hvussu kirkjugarðar treingja til at lúkast, hvussu garðaskøra o.a. breiðir seg.

Hetta fekk meg at hugsa um at royna at skipa fyri garðdegi úti í Grøv, eins og tað onkuntíð verður gjørt í barnagørðum og grannalagnum.

Veðurforsøgnin fyri leygardagin komandi er góð. Tí skjóti eg upp at tey, sum hava hug og stundir, koma í kirkjugarðin úti í Grøv leygardagin 3. august kl. 16.00 - 18.00 við havaamboðum, kaffikannu og koppum.

Vit lúka eitt sindur á okkara “matriklum” og á gøtuni frammanfyri, um tørvur er á tí. Vit heilsa uppá grannarnar hjá okkum í kirkjugarðinum, tey, sum eiga onkran við síðurnar av okkara. Vit vita helst, hvørji tey eru, men hittast ikki so ofta í hesum høpinum. Vit drekka kaffi saman og práta um okkara, sum nú eru har, men sum fyrr vóru millum okkum.

Viðlíkahald av kirkjugørðum er ein kommunal uppgáva og tað er ikki ætlanin at yvirtaka hesa uppgávuna. Tað er heldur ikki ætlanin at kjakast um, hvussu væl og hvussu ofta tað skal lúkast og sláast.

Tiltakið er fyriskipað í samstarvi við kirkjugarðsleiðaran og kommunan er kunnað.

Kirkjugarðsleiðarin syrgir fyri, at posar vera til taks til tað, sum verður lúkað, og at alt verður savnað inn og burturbeint.

Yvirlitið yvir gravir sæst her: https://gravir.kort.fo/index.html?id=klaksvik