Hóast málið hjá Framsókn um fría(ri) fosturtøku fall tann 15. mai, hevur ljóðað, at landsstýrismaðurin antin av sínum eintingum ella eftir áheitan skal leggja sama málið fram eina ferð afturat. Tað hevur somuleiðis ljóðað, at Kaj Leo Holm Johannesen í Sambandsflokkinum, sum hvørki var í Løgtinginum ella hevði biðið varamannin taka sessin tann 15. mai, fór at atkvøða fyri, um málið kom aftur í tingið.

Nú ljóðar tó á vatnrørunum, at Kaj Leo Johannesen fer í longri farloyvi, og at næsti maður á listanum tí kemur á ting. Næsti maðurin á sambandslistanum er Jaspur Langgaard, og sum skilst er hann ímóti fosturtøku ella í øllum førum ímóti liberalisering av galdandi fosturtøkulóg. Sostatt er – alt annað líka – ongin meiriluti fyri at broyta fosturtøkulógina, skuldi uppskotið komið afturíaftur, men meiriluti ímóti.

Tað, sum so frættist úr Javnaðarflokkinum, er, at ávísar kreftir í flokkinum ætla at noyða javnaðarfólkini, ið atkvøddu ímóti, til at atkvøða fyri í staðin. Sum skilst er tað hetta, sum flokksleiðslufundurin í Javnaðarflokkinum fer at snúgva seg um, og eisini er pensjónsaldurin á dagsskránni, um ryktini um flokksleiðslufund næsta leygardag eru eftirfarandi.

Í Javnaðarflokkinum vóru tað Henrik Old og Jóhannis Joensen, sum tann 15. mai atkvøddu ímóti at broyta fosturtøkulógina. Tekur Jaspur Langgard sæti, áðrenn Bjarni K. Petersen leggur felda uppskotið fyri tingið á øðrum sinni, er – alt annað líka – meiriluti ímóti, og so er neyðugt at fáa teir báðar til antin at broyta sína sannføring ella at atkvøða ímóti síni sannføring fyri at fáa uppskotið samtykt kortini. Ikki er nóg mikið við øðrum.