Kvøldskúlin: Komið og lærið nýggja talukennaran at kenna
Nýggi talukennarin VoisIT hevur nógvar spennandi møguleikar og kann leggjast ókeypis inn á iPhone og Android eindir
Fyrst og fremst so skrivar VoisIT tað, sum tú tosar á føroyskum. Hetta kanst tú kopiera og seta inn, har tú vilt. Tað veri seg eitt nú SMS, Messenger, á facebook ella í okkurt skjal so sum Word. VoisIT kann eisini lesa tað, sum tú hevur skrivað, upp fyri tær. VoisIT kann umseta úr føroyskum til so at siga eitthvørt mál. VoisIT setir sjálvt teknini í tekstin fyri teg. Í VoisIT kanst tú gera tínar egnu orðastillingar. Hetta er eitt sera hent og ókeypis amboð hjá øllum, sum kanska hava avbjóðingar við at skriva.
Í samstarvi við Lesihúsið bjoðar kvøldskúlin inn til ókeypis kunningarkvøld um nýggja talukennaran VoisIT. Dánjal á Dul Jacobsen frá Lesihúsinum kemur at greiða frá. Um áhugin er stórur er møguleiki at hava onnur uppfylgjandi kvøld. Tiltakið er á Skúlatrøð týsdagin 22. oktober kl. 19 og er ókeypis. Tiltakið er í niðaru skúlahøllini á Skúlatrøð. Øll eru hjartaliga vælkomin! Men fyri at vita nøkulunda, hvussu nógv koma, er best at melda til á: kvoldskuli@gmail.com