KÍ skrivar:

Nú er greitt at Allan Mørkøre verður høvuðsungdómsvenjari hjá gentunum í okkara Akademii í 2025

Allan kom heim aftur til felagið í januar í ár, og hevur hann trivist væl hernorðuri. Hann hevur verið høvuðsungdómsvenjnari hjá gentunum, har U16 vunnu greipuna. Og í summar yvirtók hann leiklutin sum venjari hjá U17 dreingjum, ið fingu silvur heiðursmerkir í bæði lands- og steypakappingini.

Vit fegnast um, at samstarvið er longt, soleiðis at Allan aftur verður høvuðsungdómsvenjari á gentusíðuni U11 til U16, har uppgávan er at menna leikarar og hjálpa, stuðla og inspirera okkara ungdómsvenjarar og somuleiðis at tryggja, at liðini venja eftir tí leisti, ið KÍ Akademiið hevur lagt seg eftir. 

"Eg gleði meg til komandi kappingarár í felagnum. Eg havi følt meg sera vælkomnan aftur í KÍ og stór trívist hernorðuri." sigur Allan.

Umframt at vera høvuðsungdómsvenjari verður Allan høvuðsvenjari hjá U16 gentunum í 2025.

"Vit síggja, at fleiri og fleiri gentur leggjast afturat í U11 og U13, hetta kemst heilt víst av, at vit hava sera nærlagdar og dugnaligar venjarar í felagnum." sigur Allan.

Vit gleða okkum at fylgja góðu gongdini á okkara gentusíðu í Akademinum í 2025.