Anru hevur nýliga gjørt ein roktúr á Føroya Banka.

Skiparin var væl upplagdur og greiddi soleiðis frá:

-Vit settu 46 stokkar, sum eru 43.700 húkar ella umleið 145 stampar. Á teimum fingu vit 60.000 pund, ella 30 tons. Tað er góður fiskiskapur. 27 tons var stórur toskur, ella toskur eitt, 700 kg av hýsu, og so nakað av longu, skøtu og havtasku-

-Hóast eg havi roynt á Føroya Banka í fleiri ár, so skal eg ikki gera meg klókan uppá hann. Men hendan fiskiskapin skilji eg als ikki, og nógvir við mær. Hatta var bara ein túrur og á eini ávísari leið, so eg kann ikki gera nakra niðurstøðu, men eg undrist, sigur hann.

-Hettar var øðrvísi fiskiskapur enn yvirlitstrolingarnar hjá Havstovuni vístu. Teir fingu væl av hýsu og nakað av toski. Vit fingu nærum bara stóran tosk og eitt sløg av hýsu. Hetta var eisini ein broyting frá fiskiskapinum í fjør, tá vit fingu væl av hýsu, og minni av toski, sigur Gundur.

-Toskurin var í sama standi sum í fjør. Miðal feitur og so onkur slánur uppí. Hóast onkur toskur var nærum fullur av nebbasild, so kundi tað annars sæð út til, at tað er ov mikið av toski til, og tí ov lítið at eta, sigur hann.

Anru hevur nakrar dagar eftir á Føroya Banka, og Gundur vónar at fiskiskapurin verður góður. Dagarnir kunnu gott gerast ódrúgvir, tí teir telja frá tí teir loysa frá bryggju og til teir liggja aftur við bryggju. Dagarnir áttu heldur at talt frá tí teir vóru komnir úr á bankan til fiskiskapurin endaði á bankanum.

Sjey mans eru við Anru.

Teimum og sjófólkinum annars verður ynskt Guds signing og varðveitslu!