FMA 2025, 22.mars í Varpinum!
Faroese Music Awards er tiltak, har bestu avrikini innan føroyskan tónleik verða heiðrað, og virðislønir verða latnar. Tiltakið umfatar beinleiðis tónleikaframførslur og verður sent í sjónvarpinum hjá Kringvarpinum.
Hetta er á triðja sinni, at Tónleikasamband Føroya samskipar FMA saman við Kringvarp Føroya og Norðurlandahúsinum.
"Tað gleðir Tónleikasamband Føroya at vera ein partur av FMA og vit vilja gera okkara besta fyri, at tiltakið kann umboða alt føroyska tónleikaumhvørvið á dyggasta hátt"
Hesuferð verður FMA heilt serligt. Vit fara fyri fyrstuferð at ferðast út um Havnina og til Klaksvíkar, har stásliga nýggja mentanarhúsið Varpið verður karmur um árligu virðislønarhandanirnar og mongu, serstøku tónleikaframførslurnar, leygarkvøld tann 22.mars í 2025. Og sjálvandi ber eisini til at fylgja við heima í føroysku stovunum.
Spæl Føroyskt verður 22.februar til 1.mars og er hesaferð sostatt Ikki vikuna undan FMA í 2025.
Atgongumerkissølan til FMA ER byrjað og talan er um avmarkaða nøgd!
Keyp atgongumerki HER.
Eisini ber til at keypa sær pláss á FMA BUSSINUM sum fer at koyra úr Havn, til Klaksvík og aftur til Havnar (við nøkrum stoppum á vegnum) eftir after-party í Varpinum!
Tónleikaframførslurnar á FMA verða kunngjørdar í næsta ár, men vit kunnu longu avdúka ,at tað verða nakrar serstakar tónleikaframførslur við nøkrum av tí besta, sum føroyingar hava at bjóða!
Vit gleða okkum at síggja teg á FMA!