Veðrið í vikuni
Lágtrýstini ganga í hesum døgum í landnyrðing millum Ísland og Grønland, og Føroyar fara at liggja eystan fyri tey. Tí fer ættin hjá okkum at vera um útsynning. Týsdagin fer eitt hátrýst at leggja seg á okkara leiðir, og tá fer hann at mala av ymsum ættum.
Hitalagið fer eitt sindur upp samanborið við kuldan, vit hava havt í nakrar dagar. Fram ímóti vikuskiftinum verður aftur kaldari.
Veðrið í vikuni – dag fyri dag:
Mánadagin:
8 til 13 m/s av útsynningi, skýggjað og yvirhøvur turt. Seint um kvøldið fer at regna, og eftir midnátt fer gongur hann upp í vestan og minkar sum frálíður niður í 3 til 8 m/s. Hitin 5 til 9 stig.
Týsdagin:
3 til 8 m/s av vestri, seinni útnyrðingi, smáskýggjað og yvirhøvur turt. Um kvøldið og náttina eitt lítið lot av ymsum ættum, minni enn 5 m/s. Hitin 2 til 7 stig.
Mikudagin:
Eystan og landsynningur, minni enn 5 m/s, samdrigið og regn. Um kvøldið lækkar hann niður í sunnan og veksur vindin upp í 5 til 10 m/s, skýggjað og yvirhøvur turt. Hitin 3 til 8 stig.
Hósdagin:
5 til 10 m/s av útsynningi, skýggjað allan dagin og stundum regn, men eisini turrar løtur. Hitin 3 til 9 stig.
Fríggjadagin:
Fyrrapartin 8 til 13 m/s av útsynningi, smáskýggjað og okkurt ælið. Seinnapartin ongur hann upp í vestan og minkar vindin niður í 3 til 8 m/s, smáskýggjað og ælaveður við vátakava ella kava. Um kvøldið og náttina 8 til 13 m/s av norði, smáskýggjað og kavaæl. Hitin 3 til 8 stig.