– ”Vit fáa tað problemið komandi ár, at fyrst eru kvoturnar minkaðar heilt ómetaliga nógv. Makrelurin er farin niður í ein triðing av tí, sum hann plagar at vera, og sildin er farin niður í ein fjórðing. Og um ein partur av tí fiskinum so eisini skal landast uttanlanda, so verður virksemi hjá uppsjóvarvirkjunum í Føroyum næsta ár lítið”, sigur Jóhan Páll Joensen, og heldur fram:

– ”Vit fara til eina ov hvørja tíð at fyrihalda okkum til tær fortreytir, sum vit hava fyri at keypa fisk. Men sum prinsipp halda vit ikki so nógv um tað, at føroyingar skulu opna allar hurðar fyri at keypa fisk úr Føroyum, meðan vit ikki hava somu møguleikar til at keypa fisk frá øðrum”, sigur stjórin á Pelagos, og endurtekur, at tað verður nógv minni virksemi í Føroyum.

Høvuðskappingarneytin hjá Pelagos, tá tað kemur til makrel og sild, er Noreg. Og í Noregi er krav, at skipini skulu selja fiskin á norskari uppboðssølu.