Ístaðin fer eitt annað lágtrýst at liggja nakað vestan fyri Føroyar í vikuskiftinum, og brúgvaløg haðani fara framvið í kvøld og í nátt. Hann fer fyri tað mesta at liggja av ættunum millum útsynning og landsynning.

So yvirhøvur fáa vit gráliga luft og bert fáar løtur við turrveðri og nokkso lýtt, tá ið hugsað verður um árstíðina.

Taka vit veðrið meira detaljerað, so minkar vindurin seinnapartin niður í lítið lot sunnaneftir, minni enn 5 m/s, loftið er skýggjað og okkurt ælið í støðum. Í kvøld gongur hann eysturum til landsynning og veksur vindin upp í 8 til 13 m/s, í støðum upp í 15 m/s. Í nátt gongur hann vesturum aftur til útsynning og veksur upp í 10 til 15 m/s, í støðum upp í 18 m/s, samdrigið og regn. Hitin fer at liggja millum 6 og 11 stig.

Í morgin eru 10 til 15 m/s av útsynningi, í støðum upp í 18 m/s, skýggjað, ælaveður og í støðum tám. Seinnapartin minkar vindurin eitt sindur, men í støðum framvegis upp í 10 til 15 m/s av útsynningi, skýggjað og sum frálíður regn. Út á kvøldið minkar vindurin niður um 8 m/s, skýggjað og regn. Um náttina veksur vindurin eystan- og norðanfyri, meðan sunnanfyri gongur hann eysturum til landsynning, 5 til 10 m/s, skýggjað og ælveður. Hitin alt samdøgrið millum 6 og 9 stig.

Sunnudagin 5 til 10 m/s eystan og av landsynningi, skýggjað og ælaveður. Um kvøldið fer hann niður í landsynning. Hitin millum 5 og 8 stig.

Gott vikuskifti.