Alla vikuna fer eitt hátrýst at liggja yvir Evropa, og lágtrýstini fara at ganga í landnyrðing nakað væl vestan fyri Føroyar. Vit fara at liggja eystan fyri miðjuna á lágtrýstunum, har sum ættin plagar at liggja um sunnan ella báðumegin við.

Luftin hevur sín uppruna yvir Kanada, og har er kalt. Hon ornar tó heilt fitt á vegnum hendanvegin. Viðhvørt fer hitalagið so mikið niðureftir, at vit kunnu vænta vátakava, men yvirhøvur fer dagshitin at liggja væl oman fyri tað.  

Veðrið í vikuni – dag fyri dag:

Mánadagur:

Hann fer at liggja av suðuri allan dagin, líka til seint um kvøldið. Um morgunin 13 til 18 m/s, samdrigið og regn. Út á fyrrapartin veksur vindurin upp í 15 til 20 m/s, onkra løtu 23 m/s. Hetta er skrið og næstan stormur í miðalvindi, men onkra løtu stormur. Nakrar tímar út á seinnapartin minkar miðalvindurin niður í 13 til 18 m/s, men tó fer hann onkra løtu upp í 23 m/s, skiftandi skýloft og okkurt ælið. Soleiðis gongur kvøldið, og tá ið komið er fram í móti midnátt, gongur hann vesturum til útsynning og minkar niður í 10 til 15 m/s. Týsnátt minkar hann niður í 8 til 13 m/s, meðan skýloftið er skiftandi, og okkurt ælið er, kanska við vátakava. Hitin fer at liggja millum 4 og 8 stig.

Týsdagur:

Útsynningur allan dagin. Frá morgni til kvøld 5 til 10 m/s við skiftandi skýlofti og ælaveðri, kanska við vátakava. Um kvøldið eitt sindur meira vindur, 8 til 13 m/s; mikunátt 10 til 15 m/s. Hitin fer at liggja millum 1 og 6 stig.

Mikudagur:

Útsynningur allan dagin, 10 til 15 m/s, skiftandi skýloft við ælaveðri, kanska vátakava í støðum. Hitin millum 2 og 9 stig.

Hósdagur:

Hann gongur niður í sunnan, 10 til 15 m/s, samdrigið og yvirhøvur turt. Hitin millum 6 og 9 stig.

Fríggjadagur:

Aftur sunnan, 13 til 18 m/s, skýggjað og regn. Seinnapartin støkkur hann vesturum og minkar vindin niður í 8 til 13 m/s, hálvskýggjað og ælaveður. Hitin millum 5 og 8 stig.