Á skránni vóru røður frá Karl Johansen, borgarstjóra, og Signhild Johannesen, forkvinnu í mentanarnevndini, og ein gestarøða frá Jon Heystoy, fyrrverandi úrvals svimjara og formanni í Svimjisambandi Føroya.

Harafturat var eisini sangur og tvær samrøður vístar á stórskíggja. Samrøðurnar vóru við Kristian Bjartalíð, formanni, venjara og íðkara í Hávi, og við Onnu Lovisu Mýri, triatlon íðkara. Eftir steðgin vóru heiðranir á skránni.

Feløgini, sum vórðu heiðraði, vóru Ægir fyri ársins átak, Klaksvíkar Talvfelag fyri ársins felagsskapur, kurvabóltsfelagið Hávur fyri ársins menningar-lop.

Umframt feløgini, fekk Eileen Matras heiðurin ársins eldsál. Heiðurin fekk hon fyri hennara áhaldandi ídni í felagnum Treysti.

Áðrenn Eileen bleiv rópt upp, segði Signhild Johannesen soleiðis um ársins eldsál:

Ársins eldsál er ein sólstrála. Hon lýsir upp, har hon er. Hon er heit av lyndi, og passar hetta væl saman við hennara fjálgu persónseginleikum.

Alt ber til, og um tað ikki ber til, so fáa vit tað at rigga kortini. Hon er altíð klár at hjálpa, tí hjá henni er ongin uppgáva ov lítil og ongin ov stór.

Hon sigur tingini, sum tey eru, og tú veitst altíð, hvar tú hevur hana. Umsorganin fyri øðrum menniskjum er so ómetaliga stór, og hetta sæst eisini aftur í hennara ótroyttiliga arbeiði, sum hon í nógv ár hevur lagt í felagið.  

Ársins eldsál er: Eileen Matras

Klaksvíkar kommuna ynskir at takka øllum feløgunum fyri kvøldið, og fyri tað stóra sjálvbodna arbeiðið, sum hvønn dag verður gjørt í feløgunum.