Tað bleiv ein sera spennandi dystur í KÍ-høllini, tá KÍF vitjaði Team Klaksvík í tí, sum kann vísa seg at hava verið síðsti dystur hjá besta liðnum nakrantíð.

Team Klaksvík hevur ment seg síðstu tíðina og fekk í kvøld javnleik fyri aðru ferð hetta kappingarárið. Liðini fylgdust allan vegin og síðstu minuttirnar hevði KÍF leiðsluna, tá tað ikki var javnleikur. Í síðsta álopinum fekk KÍF ikki mál og so endaði tað javnt 27-27 eftir hálvleiksstøðuna 14-14. Tað sum er gleðiligt hjá Team Klaksvík er, at teir flestu leikararnir eru lokalir og at fleiri ungir eru at síggja á vøllinum, sum ikki hava spælt undanfarnu ár.

Málini hjá Team Klaksvík skoraðu Nikolay Bliznov 8, Jens Pauli Poulsen 7, Vilhelm Vilhelmsen 5, Beinir Johannesen 4, Jan Eli Ragnarsson, Jóhan Páll Levisson og Páll Muller.