Í kvøld kl. 18.30 taka kvinnurnar hjá Stjørnuni ímóti EB. Í kappingini um at koma í endaspælið er dysturin rættiliga avgerandi fyri Stjørnuna. Seks tey ovastu liðini koma víðari til endaspælið, og spurningurin er, um tað verður Stjørnan ella EB, sum verður tað sætta liðið í endaspælinum. Støðan, undan dystinum í kvøld, er tann, at EB er á sætta plássi við sjey stigum, meðan Stjørnan á sjeynda plássi hevur seks stig. T.v.s., at Stjørnan má vinna dystin í kvøld, tí tapa tær, so hevur EB trý stig meira enn Stjørnan, og bert ein dystur er eftir at leika í innleiðandi kappingin.

Sum nevnt, so byrjar dysturin kl. 18.30, so tað er upplagt at fara í KÍ-høllina at suðla Stjørnini, og síðani beinleiðis til hús at hyggja eftir landsdysti ímillum Montenegro og Føroyar.