KÍ vann fyrra hálvleik í Finnlandi 2-1 og nú er lagt upp til eitt brak í Klaksvík komandi hóskvøld.

KÍ spældi ein sera góðan fyrra hálvleik, og var uppiborið á odda 1-0 við máli frá Jákup B. Andreasen eftir innlegg frá Árna Frederiksberg. SJK broytti leikskipan í hálvleikinum, og tað hjálpti. KÍ lat eitt stórt økið standa uttan nakran leikara og so smekkaði SJK-leikari til við góðum skoti uttanfyri brotssteigin, og so var 1-1. KÍ hevði trupulleikar, men tað hjálpti, tá KÍ skifti leikskipan frá 5-2-3/3-4-2 til tað vanliga 4-2-3-1. Og móti endanum avgjørdi KÍ eftir hornaspark, tá Mads Boe Mikkelsen skallaði inn til Gaston Tellechea, sum skoraði sítt fyrsta mál fyri felagið.

Hagtølini kunnu brúkast til nógv og tey siga m.a., at KÍ ongan dyst hevur tapt í 2025, men tey siga eisini, at einastu ferð, tá KÍ førdi eftir fyrra dystin á útivølli, tá bleiv KÍ útsligið (RFS í 2021). Lagt er upp til eitt brak komandi hóskvøld. Talan tykist verða um tvey jøvn lið, har KÍ nú hevur ein lítlan fyrimun vegna góða úrslitið á útivølli.