Magnus og Olgar áttu Víking (seinni Eldordo) í nógv ár
Myndirnar eru av Víkingi, sum var gamli Váðaklettur, og sum varð smíðaður á Stórubeding til reiðaríið hjá Kjølbro í 1946. Í 1963 varð báturin seldur til Oyndarfjarðar, har Majnhard Berg og aðrir keyptu hann. Hann skifti eisini eigarar eftir tað, men í 1977 kom báturin aftur til Klaksvíkar, tá brøðurnir Olgar og Magnus Andreasen keyptu hann av Skálafjørðinum og góvu honum navnið Víkingur.
Tann stóra myndin er tikin í 1977, tá báturin júst er afturkomin á vágna og hevur lagt at við Stengarbrúgvarnar. Aftanfyri hann sæst deksbáturin Nestangi hjá pápa og gamla Ternan og Barsskor. Á hinum báðum myndunum stendur Magnus ávikavist í stýrhúsinum og við rennuna og setir.
Í 1981 fekk báturin navnið Eldorado, sum hann hevði restina av livitíðini. Hann varð brúktur bæði til snelluveiðu, til vanligan útróður, men teir royndu eisini við kalva- og hemaralínu.
Tá teir royndu við hemaralínu eystur úr Fugloynni í 1991, fór báturin at leka illa. Har var onki at gera uttan at fara í gummibátin. Tjaldrið var statt tætt hjá, og tók menninar upp. Teir royndu tó at fara umborð aftur á Eldorado, men tá var so nógvur sjógvur í bátinum, at har gjørdist onki.
Magnus Andreasen lænti mær myndirnar.
