Kringvarpið visti í gjár at siga um ein rokmiklan fund í Javnaðarflokkinum, og tað er møguliga har, at øll í Javnaðarflokkinum hava fingið boð um at atkvøða fyri. Í øllum førum hevur Ingilín júst verið á tingsins røðarapalli og givið sterkar ábendingar um, at hon fer at atkvøða fyri uppskotinum um hægri pensjónsaldur.  

Eftir at fakfelagsrørslan um vikuskiftið hevur kært sína neyð og staðiliga mælt frá at samtykkja uppskotið, birtist í gjár ein vón, tá Kringvarpið og Norðlýsið vístu á, at Ingilín D. Strøm áður hevur sagt, at hon ikki tók undir við hægri pensiónsaldri, um arbeiðsvikan ikki varð stytt. Onki uppskot er komið um styttri arbeiðsviku, so líkt var til, at Ingilín D. Strøm tí fór at atkvøða ímóti.

Áður hevur Liljan Weihe sagt seg ikki taka undir við uppskotinum, men tað er ikki nóg mikið til at fella tað. Neyðugt verður við einum samgongutingfólki afturat, ið atkvøðir antin blankt ella ímóti.

Tað tykist nú vera greitt, at tað samgongutingfólkið ikki verður Ingilín Didriksen Strøm.