Samstarvið millum danska og føroyska kavaraskúlan hevur til endamáls at styrkja førleikarnar hjá bjargingarkavarum í donsku tilbúgvingini. Kavararnir skulu kunna taka ábyrgdina av at skipa og leiða kavingarátøk undir krevjandi umstøðum. Kavaraleiðarin hevur ein lykla leiklut í samband við m.a. trygdini hjá kavarum, fyrireiking og avgreiðslu av arbeiðinum hjá kavarum.

Á skeiðnum arbeiða luttakararnir við evnum sum lóggávu, váðametingum, neyðtilbúgving og handaligari leiðslu av kavingaruppgávum og átøkum. Undirvísingin er skipað í samstarvi millum føroyska vinnukavaraskúlan og Nordsjællands Brand- og Dykkerskole í Helsingør, har føroyskir undirvísarar lata síni royndir víðari – serliga frá arbeiði og royndum úr Norðuratlantshavi.

Bjargingarkavarar fáa við útbúgvingartilboðnum møguleika at menna seg og taka næsta stigið í sínari starvsleið sum kavaraleiðarar og kavarar.

Nordsjællands Brand- og Dykkerskole hevur drúgvar royndir innan sløkkiliðs- og bjargingartænastur, og saman við føroyska vinnukavaraskúlanum verður arbeitt miðvíst við at menna leiðsluførleikar hjá kavarum, sum dagliga arbeiða við krevjandi bjargingaruppgávum.

Serdeildin hjá Sløkkiliðnum í Keypmannahavn arbeiðir við serligum avbjóðandi bjargingaruppgávum, har kaving er ein týdningarmikil partur. Við hesi útbúgving fáa kavararnir styrkt sínar førleikar til at taka ábyrgdina sum kavaraleiðarar í møguligum vandamiklum og avbjóðandi støðum.

Samstarvið er eitt dømi um, hvussu føroyskur serkunnleiki og altjóða samstarv kann lyfta fakliga støðið – bæði í Føroyum og uttanlands.