Tá ið tað er farið norðurum mánakvøldið, er ein lítil glotti týsdagin, til tað næsta fer at nærkast mikudagin. So er aftur ein lítil glotti hósdagin, til tað triðja fer framvið norðanfyri fríggjadagin.

Hann fer at liggja millum sunnan og vestan næstan alla tíðina. Onkra lítla løtu onkra aðra ætt. Mesta regnið í nátt og mikukvøldið. Hitalagið liggur á markinum fyri regn og vátakava, so avfallið fer at vera skiftandi millum hesi.

Veðrið í vikuni – dag fyri dag.

Mánadagin:

Fyrrapartin 10 til 15 m/s av útsynningi, hálvskýggjað og sólglottar við ælaveðri, stundum grov æl, í støðum kanska vátakavi. Seinnapartin gongur hann upp í vestan og minkar vindin niður í 8 til 13 m/s, um kvøldið niður í 5 til 10 m/s. Um náttina gongur hann upp í útnyrðing, veksur vindin upp í 8 til 13 m/s, skýggjað og vátakava- ella kavaæl. Hitin 2 til 7 stig, um náttina niður í frostmarkið.

Týsdagin:

8 til 13 m/s av vestri, samdrigið og ælaveður við vátakava ella kava. Um kvøldið 5 til 10 m/s av útsynningi, samdrigið og bert okkurt ælið. Um náttina 10 til 15 m/s sunnan, skýggjað og regn. Hitin 3 til 8 stig.

Mikudagin:

Sunnan 13 til 18 m/s, samdrigið og regn. Seinnapartin eitt sindur minni vindur, 10 til 15 m/s. Um náttina vestan, 3 til 8 m/s. Hitin 4 til 9 stig.

Hósdagin:

Vestan, 3 til 8 m/s, samdrigið og regn ella vátakavi. Um náttina sunnan, 10 til 15 m/s, samdrigið og regn ella vátakavi, í støðum nógv avfall. Hitin 3 til 8 stig.

Fríggjadagin:

Sunnan, 13 til 18 m/s, samdrigið og samregn við vátakava ella kava. Hitin 4 til 9 stig.