Sum forkvinna í Trivnaðarnevndini Eldri og Bústaðir í Klaksvíkar kommunu haldi eg tað vera neyðugt at seta nøkur viðurskifti í rættan samanhang í sambandi við greinina í Frihedsbrevet, dagfest 17. mars 2026, undir heitinum “Landskassin rindar milliónir í leigu til reiðara”.

Í fleiri førum hevur Christian í Grótinum samtakið víst samfelagssinni og ábyrgd yvir fyri sínum lokalsamfelag, tá tørvur hevur verið á skjótum og fíggjarliga krevjandi loysnum, eitt nú tá bráðfeingistørvur hevur verið á at útbyggja barnagarðsøkið, tá tørvur hevur verið á umstøðum til bæði landsstovnar og kommunalar deildir, og tá ið týðandi borgaratænastur hava havt tørv á góðum høliskarmum.

Kommunan hevur eitt nú fingið gagn av, at Christian í Grótinum samtakið hevur keypt bygningar hjá kommununi, har borgarar búgva ella fáa tænastur frá tí almenna. Í hesum førum hevur samtakið víst stóran vælvilja og ábyrgd og hevur keypt og útleigað bygningar uttan at broyta virksemið, soleiðis at borgarar ikki verða órógvaðir ella noyðast at flyta.

Her er vert at leggja til merkis, at samtakið her vísir ein sera góðan vilja til at veita ”tolnan kapital” við lágum avkastkravi, ið ger tað møguligt hjá tí almenna og tí kommunala at leiga fyri ein sera sámuligan leiguprís.

Hesin vælvilji tryggjar bæði tænastur og stabilitet fyri tey, ið hava størstan tørv á tí – og tað eru vit í Klaksvík sera takksom fyri.

Vit mugu eisini ásanna, at hvørki kommunur ella land altíð hava møguleika at gera tær stóru íløgurnar, sum krevjast. Tí er samstarv við sterkar, lokalar fyritøkur avgerandi fyri menning og trivnað í okkara samfelag.

Christian í Grótinum samtakið hevur í nógv ár verið ein týðandi drívmegi í Klaksvík og hevur lagt nógv eftir seg – bæði vinnuliga og samfelagsliga. Hetta eigur at verða viðurkent.

Ein meira nuanserað frásøgn hevði givið eina rættvísari mynd av veruleikanum.

Klaksvík, 18. mars 2026
Sylvia Thomsen