Kanningarstjóri: Høgni og Aksel skullu avhoyrast alment
Kanningarstjórin, Kristina Samuelsen, advokatur: Fiskimálaráðið hevur nú boða mær frá, at trúnaðarstemplaðu skjølini og brúk av teimum ikki eru ein forðing fyri, at eg taki avgerð um at lata almenningin vera til staðar í sambandi við avhoyringarnar.
Tíðindafólk eru við hesum vælkomin at fylgja avhoyringunum av Høgna Hoydal og Akseli V. Johannesen, sum vera ávikavist 19. og 20. desember, kl. 9-12. Tað er tó umráðandi at møguligir áhoyrar eru til staðar tá avhoyringarnar byrja, soleiðis at avhoyringarnar ikki verða órógvaðar av fólki sum koma og fara.
Samandráttur av tí sum sagt er undir avhoyringunum verður partur av frágreiðingini, sum verður latin Løgtinginum. Tað verður Løgtingið, sum til tað tíð tekur støðu til, um frágreiðingin verður almenn, skrivar kanningarstjórin í teldubrævið til Norðlýsið.
Nú kanningarstjórin ger av at lata dyrnar upp fyri almenninginum eru Rógvi Reinert, aðalstjóri, Andras Kristiansen, Jens Helgi Toftum, Rúna Guttesen og Elmar Højgaard longu avhoyrd aftan stongdar dyr.