Runavíkar Kommuna bakkar
Á miðdegi í dag varð sagt í útvarpstíðindunum, at fekst ikki ein loysn uppá fíggingina av 5 næmingum úr Eysturkommunu í framhaldsdeildini í Skúlanum við Løkin, so var skúlagongdin hjá teimum liðug, tá skúladagurin í dag var komin at enda, tað vil siga klokkan 13:30 fríggjadagin 18. mai.
Nú er greitt, at næmingarnir kortini ikki skulu úr skúlanum. Ikki tí at Eysturkommuna hevur bakkað, tí hon rindar framvegis ikki fyri næmingarnar.
Borgarstjórin í Runavíkar Kommunu hevur kortini lagt eitt skriv út á heimasíðuna hjá kommununi, harí tað stendur, at næmingarnir kunnu halda fram hetta skúlaárið. Kommunan hevur annars kravt 15.000 krónur frá Eysturkommunu fyri hvønn næming. Fyrst var freistin at fáa fíggingina í rættlag 13. apríl, síðani var hon í dag, 18. mai, men hóast Eysturkommuna hvørga freistina hevur hildið, er nú greitt, at næmingarnir sleppa at gera skúlaárið liðugt.
Borgarstjórin í Eysturkommunu greiðir frá, at tað er ikki Eysturkommuna, sum hevur biðið Runavíkar kommunu um at hýsa næmingunum í framhaldsdeildini við Løkin, og kommunan vil ikki rinda fyri eina tænastu, hon ikki hevur biðið um.
Seinast eitt líknandi mál var, varð tað loyst við at næmingarnir fluttu bústað til Runavíkar Kommunu. Hetta hendi í 2014.