Eyðólvur Vang, skipari á Norðsøka og reiðari á Norðsøka og Kallanesi, letur framvegis illa at fiskiskapinum hjá størru útróðrarbátunum. 

Orsakað av at sera lítið hevur verið at fingið higartil inni á grunnum, hava Norðsøki og Kallanes verið úti á djúpum. Norðsøki hevur góð 10.000 pund nú hann avreiðir í morgun eftir at hava verið úti í tveir dagar. Teir fingu 6.000 pund annan dagin og 4.500 seinna dagin. Norðsøki hevur roynt eysturi í holinum hesar báðar dagarnar.

Hjá Kallanes hevur gingið betur hesar tveir dagarnar. Teir hava verið á Sandoyargrunninum, og avreiða um 17.000 pund.

Eyðólvur sigur, at so vítt hann veit, so avreiðir Bjørgvin frá brúkiligum túri á grunnum, teir hava 3.000 pund, ímeðan Líðhamar avreiðir 5.500 pund.