Teir vóru á fjalli í Barmi fríggjadagin. Levi Joensen letur væl at fjalldegnum.

- Veðrið royndist ikki so væl sum vit vónaðu. Tað vóru dropar næstan allan dagin. Men vit fingu alt, sum vit sóu hendan dagin. Vit vóru 9 mans og 9 hundar. Vit fóru til gongu kl. 07.00 og vóru í rættini á Norðoyri kl. 15.00, sigur Levi Joensen.

- Vit hava flett, og vektin er tað, sum hjá okkum svarar til eitt miðal ár. Tað er knapt 30 pund. Hetta er seyður, sum gongur úti alt árið. Í mun til veðrið í summar, har tað hevur verið turt stóran part av tíðini, so høvdu vit væntað nakað betri seyð, tí tað plagar at roynast betri hjá okkum, tá tað er turt, men soleiðis var ikki í ár, sigur Levi Joensen.

Hann sigur, at orsøkin fyri, at farið verður so tíðliga á fjall er, at ærnar vera betri fyri, tá tær sleppa av við lombini tíðliga. Tað hevur týðning, tá seyðurin gongur úti alt árið, og so fær man eisini betri kjøt við at fara tíðliga á fjall, leggur hann afturat.