28 ára gamli Páll A. Klettskarð segði eftir dystin móti HB í 23. umfarinum, at tað var møguligt, at hann fór av landinum eftir hetta árið. Og nú váttar hann fyri Norðlýsinum, at endalig avgerð er tikin um, at hann fer av landinum næsta ár, og tí er hetta hansara seinasti heimadystur fyri KÍ á hesum sinni.

Páll er søguligur, tí hann er ein av tveimum KÍ leikarum, sum hava skorað yvir 100 mál fyri KÍ í bestu deildini. Bara Kurt Mørkøre (121) hevur skorað fleiri mál fyri besta liðið hjá KÍ.

KÍ spælir sunnudagin kl. 15.00 sín síðsta heimadyst hetta kappingarárið móti TB/FCS/Royn.