Summarmáli er júst farin afturum og tá er summarið byrjað. Vit kenna tó enn kuldan í veðrinum og hetta sæst helst best aftur við leikvøllirnar har áskoðararnir í Betri deildini eru væl innballaðir í draktum, handskum og húgvum. Okkara veðurmaður Hanus Kjølbro skrivar í blaðnum í dag, at hitastigini so smátt kvinka í ein norðan. Tjóðarfuglurin er langtsíðani komin, tær ljósu næturnar eru byrjaðar og tey fyrstu smálombini munnu fara at koma undan heilt skjót. Ein sera hugalig tíð har vit leita út, at savnast um okkara mentan.

Runavíkar kommuna skipar fyri mentanarviku frá mánadegnum 22. apríl til sunnudagin 28. apríl. Norðlýsið kvitterar og kemur út í hvønn postkassa í Norðoyggjum og Eysturoynni mikudagin 17 apríl. Í blaðnum er millum annað heilsan frá borgarstjóranum í Runavíkar kommunu og skráin fyri mentanarvikuna.

Vit frætta frá fyrireikarunum, at tey eru sera spent og gleða seg til eina góða og innihaldsríka Mentanarviku har søga og samtíð, tónleikur og list, og kjak og upplivingar av alskyns slag renna saman við Flaggdagshaldi og tilboðum frá áhugaverda og umfatandi handilslívinum.
 
Runavíkarøkið er í teirru unikku støðu, at liggja millum størsta og næststørsta økið í Føroyum. Nú koyrandi verður ígjøgnum Eysturoyartunnilin í desember 2020, fer Runavík um skamma stund, at liggja mitt í millum. Tað er longu farið at merkjast, bæði í kommununi og ikki minst í grannakommununum, at hugurin at búseta seg við Skálafjørðin er í stórari øking. Og góða samljóðið millum Tórshavnar- og Runavíkar kommunur sæst flaggdagin, tá Annika Olsen, borgarstjóri í Tórshavnar kommunu heldur flaggdagsrøðuna í Skótahúsinum við Løkin.

Eysturoyggin og Norðoyggjar útgera tilsamans Landnyrðingsføroyar, og tað er onki at taka seg aftur í, at tað fyrst og fremst er vinnulívið, sum eyðkennir tað økið. Her er tað vinnan, sum er lokomotivið, men skilvísi, at vit liva ikki at breyði eina, at fólkið hevur brúk fyri fríløtuøkjum til endurbygging av heilsu og sál, er ikki gloymt. Løkshøll er lokali mentanarstovnurin, ið fólkið kemur saman um til felags menning og upplivingar. Á mentanarvikuni verður Løkshøll á tremur við áhugaverdum tiltøkum. Í Klaksvík bíða vit í spenningi eftir okkara egna mentanarhúsi.

Klaksvíkingar vita alt um, hvat tað merkir at vera lokalur, men runavíkingar munnu ikki standa langt aftanfyri. Tað at vera góður við sítt lokaløki sæst væl aftur í vinnulívinum, men eisini í ítróttinum, átrúnaðinum og felagslívinum annars. Her eru fleiri ítróttarfeløg við Skálafjørðin, hvørt við sínum serstaka lokala felagsanda. Tann sokallaði lítlibeiggin Skála liggur í løtuni á odda í Betri deildini, eitt framúr avrik – klaksvíkingarnir innan og uttan strikurnar hjálpa helst væl til hesum viðvíkjandi 

Økið við Skálafjørðin er kanska tað økið í Føroyum, har menningin gongur við mest rívandi ferð. Runavík er longu eitt vinnuligt og fíggjarligt kraftsentur í Føroyum, og stendur til at gerast miðdepil í Norðurføroyum. Løgmaður segði í Ólavsøkurøðuni, at fyrisitingin hjá Vága- og Norðoyartunlinum skuldi flytast til Runavíkar á nýggjárinum. Enn er tó onki hent, men nú borgarstjórin er úti í miðlunum og sóknast eftir flytibilunum, man ikki long tíð ganga til hetta er komið í rættlag, serliga nú løgtingsvalið nærkast.
 
Borgarstjórin í Runavíkar kommunu hevur harumframt bjóða landinum ókeypis matrikul við framúr parkeringsmøguleikum til nýggja mentanarstovnin Tjóðleikhúsið. Samgongan sigur, at nýggir stovnar skulu leggjast úti kring landið, serliga nú vegasambandið er so væl útbygt við enntá tveimum koyribreytum – eina høgrumegin og eina vinstrumegin.
 
Góða mentanarviku!