Fá mundu varnast øgiliga vøksturin í ferðavinnuni, tá vit fyri nøkrum árum síðani endurstovnaðu Ferðaráðið, sum seinni bleiv til Visit Faroe Islands. Politiskt settu vit í ringum fíggjarligum tíðum eyka pening av á fíggjarlógini til ferðavinnuna. Sera dugnalig fólk settust við róðrið í ferðavinnuni, og nú standa vit við avbjóðingum, sum krevja dyggar loysnir.

Miðflokkurin hevur somu støðu, sum Hans Andrias endar vakra fosturlandssangin við:

“Um vit eru fá og smá, kunna mið tó gerast há.”

Ferðavinnan skal vera eitt sterkt búskaparligt bein at standa á til gagns fyri allar føroyingar.

OG TAÐ BER VÆÆÆL TIL.

·      Bøndur ráða yvir sínum øki. Tí skal almenni myndugleikin áleggja ferðavinnuni at styðja seg til bøndur og teirra ynskir og krøv í eini framtíðar samskipan av ferðavinnuni.
Ongin skal kunna selja ein gongutúr til útlendingar niðan á tindin ella framvið ánni, uttan at bóndin er við og fær sín part.

·      Ferðamál skulu gerast í samstarvi millum bøndur/eigarar, ferðavinnuna, land og kommunur. Nøkur ferðamál so sum fjallagøtur, rennistreingir, gongutunlar til sjóholur, innrætting í sjó- og fjallaholum, fjallamatstovur v.m. krevja íløgur. Her skal búnaðargrunnurin fáa víðar heimildir at veita lán og stuðul til bøndur/eigarar ella samtøk millum bøndur og ferðavinnuna.

·      Ferðafiskivinna skal hava egna lóggávu, sum m.a. ásetir krøv til ferðasmiðir, trygd á sjónum, treytir viðvíkjandi veiðirættindum við meira.

·      Smidligar gjaldsskipanir verða settar í verk, har landið, eigarin/bóndin, ferðavinnan v.fl. fáa sín part. Ein møguleiki er at krevja gjøld við kassa 1, har ferðafólk umvegis ferðaseðilin gjalda vegskatt, tunnilsgjald, gongutúragjald, umhvørvisgjald o.a.

·      Fólkið, sum her býr, er ikki ferðafólk og hevur tey rættindi, sum vit altíð hava havt.

Miðflokkurin er tilreiðar og hevur nógv upp á hjarta til gagns fyri ferðavinnuna og til gagns fyri land og fólk.

Tað ber VÆÆÆL til at leggja so til rættis, at øll verða vinnarar.

 Bill Justinussen, valevni fyri Miðflokkin