2500 sóu dystin KÍ - Víkingur
Tað sær út sum at dystirnir hjá KÍ á Summarfestiválinum gerast "lagnudystir" fyri KÍ. Nú fáa vit at síggja. - Men dystirnir á Summarfestiválinum geva væl í kassan hjá KÍ. Í ár vóru tað soleiðis 1280 áskoðarar, ið guldu atgongumerki. Sum kunnugt sleppa børn ókeypis til dyst og harafturat eru nøkur fríkort, so alt í alt verður roknað við at 2500 vóru til dystin, sum KÍ vann á Víkingi við tveimum málum.
Stóri og sterki leikarin hjá Víkingi, Atli Gregersen, er altíð góður fyri eina stuttliga søgu. Tá dysturin var um at byrja og allir leikarar vóru farnir út á vøllin, kemur Atli Gregersen leypandi til mín og gevur mær eitt orduligt klemm í tí hann sigur. "Eg helt at eg skuldi geva tær eitt klemm nú, tí aftaná dystin fært tú onki". - Hetta er fyrstu ferð eg nakrantíð havi verið út fyri nøkrum tílíkum og nógvir eru dystirnir eg havi fylgt við myndatólinum, men eg skal viðganga, at tað fløvaði. Hví Atli gjørdi, sum hann gjørdi veit eg ikki. Hinvegin, hevur hann heilt víst klára seg sum ein av allar bestu føroysku leikarunum, júst tí at tað er ikki til at rokna út, hvat hann kann finna upp á, hann er ikki sum allir hinir.