Vardu væl í fyrra hálvleiki

Sum væntað setti Spania seg tungt á dystin frá byrjan. Føroyar spældu í einari 5-4-1 líknandi leikskipan, sum vísti seg at rigga væl. Tí Spania kom ikki til nógvar stórar málmøguleikar. Hálvliksstøðan var 1-0 til Spania eftir eitt mál, sum føroyingar hildu vera rangstøða. Tilsamans hevði Spania eini fýra góðar málroyndir, meðan Føroyar høvdu eitt vandamikið álop, sum endaði við langskoti frá Jóannes Bjartalíð. Onkra løtu spældu føroyingar væl ímillum sín og leikararnir tóktust meira tryggir enn móti Svøríki, tá trýst var á bóltinum frá mótstøðuliðnum.

Jóannes Bjartalíð fekk stóra málmøguleikan

Í seinna hálvleiki kom Spania beinanvegin uppá 2-0 og fyrsta partin av hálvleikinum var ofta nær við, at tað bleiv 3-0. Men antin bjargaði ein vælleikandi Gunnar Nielsen ella kom okkurt føroyskt bein fyri. Í 73. minutti fingu føroyingar stóra málmøguleikan, sum man sjáldan fær á útivølli móti so sterkum liði. Jóannes Bjartalíð gjørdist púra leysur við David De Gea, men málverjin bjargaði skotinum. Hóast Jóannes ikki skoraði, so fekk hann staðfest hendan dystin, at hann hevur landsliðsstøðið og dygdirnar til at koma til vandamiklu støðurnar, hóast talan var um fyrsta dystin frá byrjan. Eisini kann nevnast, at hinir ‘’nýggju’’ leikararnir, Heini Vatnsdal og innskifti Andrias Eriksen, komu væl frá sínum uppgávum. Teir hava givið venjaranum fleiri møguleikar at stilla liðið framyvir. Móti endanum av dystinum fekk Spania tvey mál afturat til endaliga úrslitið 4-0. Bæði málini skoraði innskifti Paco Alcacer, sum hoyrir til ''sterkastu'' uppstilling hjá Spania. 

Uppreisn

Ímun til dystin móti Svøríki, so var talan um nógv betri føroyskt avrik, hóast úrslitið var tað sama. Verjuspælið hekk væl saman í stórum pørtum frá aftasta til fremsta leikaran og málverjin spældi ein góðan dyst. Frameftir kom ein heilt stórur málmøguleiki og onkur góð støða afturat. Hóast Spania spældi við eykaliðnum, so var talan um sera sterkt mótstøðuliðið og 4-0 til Spania er helst eitt úrslit, sum hjá mongum kann koma undir ‘’heiðurligt’’ tap. Stríðsandan og tað at fleiri nýggir leikarar bjóða seg fram við góðum avrikum er nakað, ið kann takast við víðari frá hesum dystinum.