Alexandra á Dul, stjóri á Klaksvíkar Sjúkrahúsi bjóðaði væl komin til lítla móttøku í samband við gávuna frá skótunum.

Síðani var tað Símin Michael Sørensen, fíggjarleiðari hjá Skótasambandinum, ið segði nøkur orð innan skótarnir handaðu gávuna til Benadicta Ellingsgaard, leiðandi fysioterapeautur á Fysiurgiska/Ergo deild á Klaksvíkar Sjúkrahúsi.

Símin Michael segði millum annað at stavnhaldið hjá skótunum í hesum sambandi er, at frísk og ferðug børn stuðla og hjálpa neyðstøddum, sjúkum og illa støddum børnum og ungum í Føroyum og uttanlands við pengum, sum á hvørjum ári eru savnaðir við arbeiði ella á annan hátt. Árliga hjálpin fer til eina útlendska og eina føroyska verkætlan. Ein partur fer í grunn til hjálp við brádliga ákomna neyð.

Benedicta Ellingsgaard takkaði fyri vegna Klaksvíkar Sjúkrahús og børnini, ið fáa ókeypis venjing á Klaksvíkar Sjúkrahúsi. Petø er eitt venjingartilboð til børn við serligum avbjóðingum. Skipað verður fyri tveimum skeiðum um árið á 3 vikur. Petø konduktørur, ergo- og fysioterapeutur við serkunnleika til økið eru knýtt at skeiðunum.

Vegna seg og síni, takkaði Ragnhild Ellingsgaard fyri tað menning og framgongd hon hevur sæð hjá dóttir síni, ið hevur luttikið á slíkum skeiðum.

At enda lovaði Benedikta Ellingsgaard, at peningurin, ið skótarnir í dag lótu, skulu fara óskerdir í nýggj amboð til børnini, sum fara at luttaka í skeiðum frameftir.