Nógvur vindur í nátt og í morgin
Lágtrýstið, sum hevur givið okkum vátakava og/ella kava í gjár, er nú farið norður í Barentshav. Vit skulu ikki bíða leingi eftir tí næsta. Tað fara vit at merkja í kvøld, í nátt og í morgin.
Vanligt er, at ein hátrýstryggur við góðum veðri stingur seg upp ímillum tvey lágtrýst. Soleiðis hevur eisini verið hesaferð.
Í nátt hevur verið gott veður – eitt lítið lot úr útnyrðingi-norði.
Á middegi í dag fer hann at mala úr ymsum ættum eina løtu, men út á seinnapartin er ættin landsynningur. Tað er so tað fyrsta, vit fara at leggja til merkis tað nýggja lágtrýstið.
Tað verður lítil vindur í byrjanini, men í kvøld fer hann at veksa, samstundis sum eitt brúgvalag við kava og/ella regni nærkast okkum úr útsynningi, og ættin fer upp ímóti eystri.
Á midnátt er vindferðin komin upp í 15 til 20 m/s úr eystri, og nakrar tímar seinni er vindferðin komin upp í 20 til 25 m/s av landnyrðingi. Mesti vindurin verður eftir klokkan 8 í morgin ári – um 22 til 27 m/s í miðalvindi. Hetta er hvassur stormur.
Lágtrýstið, sum stendur fyri hesum nógva vindinum, fer framvið beint sunnan fyri Suðuroy út á fyrrapartin í morgin. Trýstið er tá um 951hPa – og tað er sera lágt. At lágtrýstið kemur so nær okkum, merkir, at tað skal bert lítil broyting til, at veðrið ikki verður sum spátt.
Vindurin fer at minka eftir middag í morgin, og ættin fer at flyta seg upp ímóti norði.
Lágtrýstið er endaliga farið frá okkum á middegi mánadagin. Tá verður gott veður aftur við lítlum vindi av norði, so skiftir hann aftur til landsynning-sunnan, og tað næsta djúpa lágtrýstið fer at nærkast…