Tað djúpasta lágtrýstið higartil í ár, sum merkist her í Føroyum, stendur í dag einar 600 fjórðingar norðan fyri Føroyar. Tað er nokkso langt burturi, men tað er so djúpt – t.e. nógvur vindur er rundan um tað – at tað setir sín dám á veðrið í Grønlandi, Íslandi, Skotlandi, Skandinavia og so sjálvandi eisini her í Føroyum.

Tað ringasta veðrið kring hetta djúpa lagtrýst, er í dag og í morgin har sum Føroyar eru. Eftir at tað ringasta er farið framvið seinnapartin í morgin, fer tað ringa veðrið at raka Norra.

So er tað tað, hvussu veðrið fer at vera restina av degnum í dag og í morgin.

Status í løtuni er (klokkan 11), at vindferðin liggur um 25 til 30 m/s í Mykinesi og í Akrabergi. Hetta er miðalvindferðin á hesum støðum – sí www.vedrid.fo. Ættin er útsynningur ella útsynningur-sunnan.

Undan ættini er minni vindur – um 15 m/s á Eiði, á Kirkju og í Havn. Øll hesi tøl geva miðalvind kring landið uppá góðar 20 m/s. Hetta er stormur – tó at øll ikki merkja storm.

Seinnapartin kemur eitt brúgvalag við regni afturat – hetta verður um 14-15 tíðina. Tað fer ætlandi skjótt framvið okkum, og tá ið tað er farið eysturum um 17-18 tíðina, slítur í, vindurin minkar niður í 15 til 20 m/s, og ættin fer upp í útsynning-vestan.

Um 20 tíðina í kvøld fer vindurin aftur at veksa. Á midnátt er vindferðin komin upp í 20 til 25 m/s. Stormur ella hvassur stormur í miðalvindi. Saman við hesum skulu vit vænta ælaveður við regni ella vátakava ella kava.

Í nátt fer vindferðin at liggja um 23 til 28 m/s. Mesti vindurin fer at vera frá klokkan 3 til 7 í morgin ári.

Á middegi í morgin er ætlandi minkað niður í 18 til 23 m/s.

Her á Norðlýsinum verður fylgt við veðrinum…