Tær góvu lív
Mánakvøldið greiddi Rigmor Dam frá á Café Gloria um verkætlanina, hon kallar: “Tær góvu lív” Rigmor Dam vil fegin hava samband við fólk, sum hava vitan um evnið. Eisini fólk, sum hava eina søgu at fortelja.
Rigmor legði út við at siga, at hon í mong ár hevur verið upptikin av hesum kvinnum, sum góvu lív við at lata lív. Meðan minnisvarðar eru reistir og nógv skrivligt tilfar sigur frá sorgarleikum um menn, sum fórust á sjónum frá eftirsitandi konu og børnum, er onki tilfar at finna um hesar mammur, sum doyðu frá manni og børnum í hesi týdningarmiklu uppgávu at eiga børn.
Hetta hevur hon sett sær fyri at gera nakað við, og vónar at kunna birta hugin hjá onkrum at granska víðari í hesum sera víðfevnda evni, sæð út frá so nógvum sjónarhornum s.s. sosialviðurskifti, seksualviðurskifti, heilsuviðurskifti, familjuviðurskifti o.s.fr.
Hon legði dent á, at arbeiðið er i gongd – tað er ikki liðugt! - Hóast hon longu nú veit nógv meir, enn hon visti, áðrenn hon byrjaði uppá arbeiðið, so veit hon ikki nóg mikið enn, og eggjaði í hesum sambandi fólki, sum vita okkurt um hetta evnið, at seta seg samband við hana.
Í arkivinum hjá statinum hevur Rigmor funnið deyðsváttanir við upplýsingum um deyðsorsøkir hjá konum á barsilssong, og onkrar av hesum vísti hon uppá á skíggjan. Áhugaverdur og sterkur lesnaður, sum elvdi til álvarssom andlitsbrá og suff í salinum.
Í fyrilestri sínum vísti Rigmor á, at við at umrøða hesar ungu kvinnur, vekja vit tær onkursvegna aftur til lívs – tær eru hjá okkum í huganum.
Arbeitt verður við verkætlanini í frítíðini, men um alt gongur eftir vild, so eydnast kanska at fáa minnisritið út áðrenn jól. Livst so spyrst.