Lýsing
Lýsing
Løgmaður fyriskipaði tíðindafund fyrrapartin í samband við Corona smittuvandan | Mynd: kvf.fo

Almennu Føroyar repa seglini – men steingja ikki

SKRIVAÐ: Jóhann Lützen  |  12.03.2020 - 10:28 Leiðarin Politikkur Tíðindi

Covid-19: Allir skúlar frá fólkaskúla til fróðskaparsetur leggja stilt frá og við mánadegnum. Mælt verður eisini til at kommunurnar lata barnagarðar og frítíðarskúlar aftur, men hetta er nakað, kommunurnar sjálvar gera av. Almennu partafeløgini skulu seta tiltøk í verk, m.a. Atlantic Airways og Vága Floghavn. Hartil verða kommunurnar bidnar um seta tiltøk í verk ímóti ferðamannaskipum.

Sjúkrahúsverkið planleggir nú skurðviðgerðir soleiðis, at mest møgulig arbeiðsorka er tøk, um talið av smittaðum økist knappiliga og skjótt. Annars verða tey alment løntu starvsfólkini, ið verða rakt, í mest møguligan mun biðin um at arbeiða heimanífrá. Hetta er eitt nú galdandi fyri lærarar.

Á tíðindafundinum í morgun var rættiliga nógvur kritikkur av, at flogferðslan heldur fram at kalla ótarnað. Men hvørki fútin, landslæknin, løgmaður ella heilsumálaráðharrin vildi steðga ferðing til og úr Føroyum. Hetta verður mett at “lukka samfelagið niður”, og ein uppgáva er at halda samfelagið koyrandi hóast alt, segði fútin.

Landslæknin segði, at tað nú ikki longur slepst undan, at Coronasmittan kemur til Føroyar. Tilmælið er at so mong sum gjørligt fara í sjálvboðið sóttarhald, herímillum eisini lesandi, sum verða rakt av, at skúlar í Danmark lata aftur. Eitt tílíkt sóttarhald er í 2 vikur.

Løgmaður endurtók fleiri ferðir, at um støðan versnar, so verða helst sett strangari tiltøk í verk, men at vit enn ikki vita, hvørji tey vera, tí støðan verður eftirmett leypandi. Sostatt kann hugsast, at eisini flogferðsla fer at verða rakt, skuldi tað hent, at smittan fer at ganga ímillum  føroyingar. Sum nú er, eru tey bæði smittaðu smittað í útlondum, ávikavist Fraklandi og Italia, og ikki í Føroyum.

Størsta avleiðingin av átøkunum sum vórðu sett í verk á tíðindafundinum í morgun er sostatt, at føroyska skúlaverkið steðgar. Hildið verður á í dag, hósdagin, og í morgin, fríggjadagin, men síðani skulu næmingarnir ikki møta longur. Arbeitt verður við umlagdari undirvísing, soleiðis at næmingarnir fáa fylgt undirvísing heimanífrá, har tað ber til.

Løgmaður segði eisini, at tey almennu starvsfólkini, sum verða rakt av hesum, missa ikki løn. Hetta er bæði galdandi fyri tey sum skulu arbeiða heimanífrá, og tey sum ikki fáa arbeitt.

Ein stórur partur av tilmælunum var áheitanir á kommunurnar, og snúðu seg um ferðamannaskip, dagstovnar og frítíðarskúlar. Her hevur landsmyndugleikin valt ikki at áleggja kommununum harraboð, men heitir á tær hvør í sínum lagi um at taka neyðug atlit. Tað var tó rættiliga greitt, at ynskið var, at kommunurnar lótu dagstovnarnar aftur og helst ikki loyvdu ferðamannaskipum at lata ferðafólkini sleppa í land.

Borgarstjórin í Tórshavn var eftir tíðindafundin í útvarpinum og boðaði frá, at ferðandi við ferðamannaskipinum, sum skuldi koma 20. mars (og møguliga kemur), ikki sleppa í land. Hinvegin sleppir Norröna, ið øllum førum sum er, framvegis at sigla uppá Havnina, hóast hon eisini er eitt cruiseskip. Borgarstjórin sigur, at onnur ferðamannaskip enn Norröna sleppa ikki at lata ferðafólk sleppa í land í fyribils 2 vikur.

Eftir tíðindafundin harmaðist løgmaður um, at fólk longu farin at hamstra vørur, og segði, at hann vónaði, at fólk fóru at hava ein so vanligan gerandisdag sum til ber innanfyri karmarnar av tiltøkunum, ið nú verða sett í verk.

Lýsing
Seinastu tíðindini
Ægir: Hægstu stigatøl á FM 2020
Signhild Joensen ársins svimjari
Fleiri ungir línumenn við Havbúgvanum
Sigursgongdin hjá KÍ kvinnunum heldur áf…
Gloymið Bústaðir! Latið kommunur­nar bygg…
Áki Mørk: Vónirnar eru góðar hjá styrktu…
Jofridt Jensen úr Fuglafirði níti ár 6.…
Corona: Ein tilburður staðfestur
KÍ vendi aftur øllum og vann
Vitja 5 fjallatoppar og vinn
Kirkju­bøkur­nar í Eysturoynni
Kaj Leo Holm Johannesen helt røðu til pr…
Upptakt: KÍ-TB
Søla í smáttunum
Kommunala Eftirlitið kannar valagn
Tøkk
Fleiri vegir verða asfalteraðir
Norðlýsið á gøtuni
Læra av Bakkafrost
Danmark-Føroyar í oktober