Teir koma inn at landa í morgin og hava seinastu dagarnar havt rættiliga gott fiskarí - um 5-6 tons í snitt um dagin. Teir hava roynt norðanfyri Føroyar í til samans 28 dagar.

Teir heysa og rundfrysta fiskin - meginpartur toskur, men nakað av hýsu er eisini uppíí.

Teir liggja og draga norðanfyri – vestastir á, har tað eisini eru hópin av øðrum bátum: Stapin, Vesturhavið, Búgvin, Falkur, Heykur, Oknin, Sigatindur, Núpur og fleiri.

Vegna sóttina og smittuvanda hevur manningin á Ågot valt sjálv at landa. Tá ið liðugt er at landa - eini 10 -12 tímar, fær manningin ein betri bita umborð.

Teir verða eftir ætlan sovandi umborð fyri at minka um smittuvanda og fara avstað aftur leygarkvøldið.

Talan er um álvarsama støðu fyri skipið, har umráðandi ikki at fáa smittuna umborð. Onkur avvarandi at manningini er í sóttarhaldi.

Teir hava eini 150 tons og kunnu vænta sær eini kr. 28,- pr. Kg. So um teir ikki sleppa avstað aftur vegna sjúku ella onkur smittaður kemur umborð, kann tað gerast ein smeitur fyri skipið.

Tí hava teir vælt sjálvir at landa, sova umborð og ikki í landi og fara at kalla allir avstað aftur leygarkvøldið.