Eins og seinast byrjaði Jógvan Andrias Joensen við at gera frá um hølini. Seinast var tað Spaniastova, og nú var farið víðari og greitt frá øllum bygninginum hjá gamla Kongaliga Einahandlinum, ið húsaðist har frá 1838 og fram til 1856 – við lítlu víkina, Klakksvík hevur navn eftir. Orðið fór so víðari til konferencier, Ragnhild Ellingsgaard, ið greiddi frá skránni og kom við áheitanum um smittufyribyrging.

Steintór Rasmussen og dóttirin Rakul Ró Steintórsdóttir settu sín dám á við “gittara og sangi” tíðliga í sendingini og við felagssangi móti endanum, og komu stak væl frá báðum. Tað sama gjørdi solisturin Hans Andrias Jacobsen, sum gav fleiri nummur á guitar og munnhørpu eftir at umboð fyri kommunu og vinnu hvør í sínum lagi høvdu verið á skíggjanum við meira álvarsomum boðskapum.

Hetta eru álvarsamar tíðir, og tað slepst sjálvsagt ikki undan álvara í sendingini. Signhild Vilhelmsdóttir Johannesen, varaborgarstjóri, greiddi frá hvussu kommunan og vinnan í kommununi varð rakt. At tiltøk eru avlýst, ítrótturin liggur púrasta lamin, men kom so eisini inn á, hvussu væl fólk høvdu tilpassað seg við til dømis venjingum á netinum og óbeinleiðis eisini við sendingum sum hesari.

Vinnulívið var eisini umboðað í tí meira álvarsama táttinum av sendingini, og har var Petur Simonsen frá North Pelagic komin í Leika-studio at greiða frá, hvussu teirra fyritøka var rakt av Corona. Fyritøkan er merkt á tann hátt, at tey nú arbeiða nógv heimanífrá, at goymslurnar ikki minka serliga skjótt, men at marknaðirnir hóast alt eftirspyrja og keypa enn. Sum heild er virksemið á einari leið enn, men Petur var ikki heilt álvuligur við gongdina, har líkt er til, at lond, sum Føroyar handla við, lata alsamt meira aftur.

Jákup Biskopstø Andreasen var eisini í sendingini og viðgekk fyri opnum skermi, at hann hevði verið í song við FM-steypinum frá 2019. Hendan afferan vardi tí ikki leingi, tí síðani hevur hann ikki sæð steypið, ið hevur gingið runt á m.a. jólafrokostum og heldur ikki kundi koma við í sendingina.

KÍ er hart rakt av Corona. Venjingin er rakt og fyrigongur í stóran mun einsæris nú, eins og tað fíggjarliga somuleiðis liggur í tí óvissa. Liðskiparin segði seg vóna, at teir sleppa upp í hjálparpakkan hjá ALS. Hetta tóktist vera víst, men síðani íkom ivi um tað, og eftir øllum at døma kemur ein avkláring í hesi vikuni. Eisini greiddi Jákup B. frá, at teir nokk skulu vera klárir bæði við atliti at motivatión og formi, tá ið kappingarnar einaferð byrja aftur.

Hæddarpunktið var kanska nýggi Coronatátturin hjá Hans Hjalta Skaale. Væntanirnar vóru stórar, og Hans Hjalti leveraði sanniliga eisini vøruna. Steintór Rasmussen hevði skrivað orðini, og eins og sendingin byrjaði, tóku hann og dóttirin Rakul Ró sær eisini av at syngja og spæla fyri til felagsanginum til endans í sendingini. Sangurin var “Saman við tær” hjá Frændum.

Øll leingjast vit eftir at sleppa út aftur, men um vit ikki sleppa tað í bræði, er ikki ómøguligt at vit fáa eina sending afturat, sum Ragnhild eisini rundaði av við at siga.

Sí sendingina her.