Í dag vandu menninir við Nevinum Reyða, ein av sterku føroysku róðrarmanningunum. Men enn er støða ikki tikin til, um nakar kappróður verður um skipað verður fyri Norðoyastevnu í ár.

Sum skilst, so eru tilráðingarnar framegis í móti at Norðoyastevnan yvirhøvur verður hildin. Vit skulu framvegis halda fjarstøðu, hvør frá øðrum. Fjarstøðan skal vera tveir metrar, og tað ber ikki til í einum kappróðrarbáti.

Eitt nú hevur Bakkafrost verið ein dyggur hjálpari til kringumstøðurnar til kappróðurin á Norðoyastevnu, bæði við fólki og útgerð. Alivinnan hevur aðrastaðni og eisini í øðrum sambandi verið sera varin, tá smittuvandi er í umhvørvinum.

Sum Norðlýsið skilir, so er tað heilt upp til nevndin í Klaksvíkar Róðrarfelag um kappróðurin á Norðoyastevnu skal gjøgnumførast í juni.

Aðalfundur er nevniliga í KR týsdagin og tá skal nýggj nevnd veljast. Sum skilst, so verður fyrsta uppgáva hjá nýggju nevndini at taka støðu til Norðoyastevnuróðurin.

Alt hetta frætta vit tí nærri um seinni í vikuni.