Virðið fólksins vilja
Plukkið heldur tær lágthangandi fruktirnar, sum eru í Sjúkrahúsverkinum, heldur enn at arbeiða beinleiðis ímóti fólksins vilja , sigur ein avgjørdur Frimodt Rasmussen tinglimur fyri Sambandsflokkin
Norðlýsið hevur vent sær til Frimodt Rasmussen, samgongutinglim at frætta hansara hugsan um ætlaðu navnbroytingar fyri tey trý sjúkrahúsini í Føroyum.
Tað eru onnur meira átrokandi mál at fáa uppá pláss í sjúkrahúsverkinum enn at skifta navn. Úr rúgvuni kann eg nevna viðgerðartrygdina, ið má hava hægstu raðfesting, yvirlit yvir bíðilistar og samskipan av tí kliniska økinum, sigur Frimodt Rasmussen.
Tað eru fleiri loysnir, ið eru skjótar at gjøgnumføra, læt okkum brúka pengarnir á skilabestan hátt, soleiðis at vit røkka viðgerartrygdini skjótast gjørligt, sigur Frimodt Rasmussen í stuttari viðmerking ávegis til havnar á tingfund.