Amerikanski ambassadørurin: Forsetavalið er vónleyst at spáa um
Eitt tað heitasta samrøðuevnið í USA í løtuni er sjálvsagt forsetavalið í november. Carla Sands var bersøgin og erlig, tá hon segði, at tað ber ikki til at siga longu nú, hvønn veg tað ber. Hon harmaðist yvir, at støðan í USA var so ógvuslig og merkt av harðskapi í sambandi við valið, og hevði ynskt sær karmar sum teir, vit sjálvi fara at hava til kommunuvalið eina viku seinni – sum sendikvinnan væl visti um.
Carla Sands viðurkendi, at í USA er støðan í løtuni “komplicerað” (complicated). Hon er nógv merkt av rasu-ófriði, eins og av búskaparligu trongstøðuni, tí amerikanski búskapurin hevur tað ikki gott í løtuni. Hetta væntaði Carla Sands fór at spæla inn, men hon legði áherðslu á, at USA var kanska tað minst rasistiska landið í heiminum. Hon vildi fegin undirstrika, at sum samfelag stremba tey eftir so nógvari javnstøðu sum gjørligt, uttan mun til húðarlit.
Amerikanska sendikvinnan treiv í amerikonsku søguna, bæði í Grundlógina frá 1776, ið tryggjaði javnrættindi, og borgarakríggið 1861-1865, har Norðurstatirnir, ið vildu avtaka trælahaldið í USA, vunnu. Somuleiðis leggur núverandi amerikanska stjórnin dent á at seta fólk av øllum rasum og sannføringum í starv. Tað er ólógligt at gera mismun vegna rasu í USA.
Viðvíkjandi tí búskaparliga, so hevði sendikvinnan hug at rósa nøkrum av avgerðunum hjá Donald Trump, forseta, serliga at hann hevði gjøgnumført eina skattanýskipan og linkað um reguleringar. Sendikvinnan helt, at forsetin við hesum hevði fingið USA at líkjast meira Føroyum og Danmark. Hon vísti á, at í Føroyum og Danmark er eisini bannað at gera mismun á vegna húðarlit, eins og vit høvdu reist okkum skjótt eftir fyrstu bylgjuna av Corona-virusi. Tað fór USA eisini at gera, væntaði Carla Sands, og tendensirnir vóru longu farnir at vísa seg.
Tingini eru als ikki gingin, sum búskaparfrøðingarnir væntaðu, segði sendikvinnan.
Sí samrøðuna niðanfyri