Ítøkiliga verður nevnd útgerð sum bummar og ávaringarljós við tunnilsmunnarnar, og Landsverk hevur áður boðað frá, at teir ikki hava neyðugu pengarnar til tað. Ætlanin er at seta útgerðina upp við tunlarnar Norður um Fjall beinanvegin, men eisini so við og við at seta hana upp við aðrar tunlar, ið heldur ikki hava hesa útgerð.

Orsøkin, sum stendur í viðmerkingunum til lógaruppskotið, er, at eldur kom í ein bil í Árnafjarðartunlinum í juli, og hetta gjørdi, at mangulin uppá trygdarútgerð bleiv greiður.

Talan er um eykajáttanaruppskot uppá 3 milliónir, soleiðis at játtanin til vegir og havnir tilsamans gerst 226,5 mió. Hetta er uppskot frá einum andstøðutinglimi, so tað er eisini neyðugt at sannføra samgonguna, ella partar av samgonguni, um, at hetta er skilagott. Men verður hetta samtykt, verður útgerðin sett upp beinanvegin eftir tað.