Lagið er skrivað í vár, tá sjúkan legði landið lamið og gøturnar oydnar. Íblásturin til tekstin kemur úr Klaksvík, sum eins og restin av landinum lá brakk hesar vikurnar. Býurin tóktist tó hava sama puls undir húðini - ein pulsur, sum altíð hevur hugtikið limirnar í bólkinum, ið hevur havt nógvar løtur í býnum í norðuroyggjum.

Upptøkan er úrslit av einum venjingartúri, sum Páll Finnur Páll gjørdi á Sandi fyrr í summar. Tvey løg eru upptikin. Tað fyrra, Nær Kemur tú heim, kom út fyri tveimum vikum síðani.

Hetta seinna, Býurin Svevur, er nú liðugt og kann hoyrast her:

Eisini hesaferð hava Páll Finnur Páll heitt á talentfullu Daniu O. Tausen at hjálpa við kórrødd.

Theodor Kapnas hevur miksað.

Páll Finnur Páll varð stovnaður í Hoydølum í 1999. Hesi 21 árini hevur bólkurin latið fimm útgávur og fimm stakløg úr hondum.