KÍ byrjaði sínar regluligar venjingar á vøllinum í hesi vikuni og nú verður vant ella spælt dyst nærum hvønn dag fram til kappingarbyrjan 7. mars. KÍ-hópurin nærkast at vera endaligur.

 

 

Ísak og Óli Gevast – Patrik spælir ikki í Føroyum

Fyri nøkrum vikum síðani vóru nøkur fá ivamál um leikarar, sum spældu við í fjør. Nú tykist alt vera nærum endaliga greitt.

27 ára gamli Ísak Simonsen steðgar við at spæla á hægsta stigi eftir at hava verið partur av besta liðnum hjá KÍ í 11 ár. Sostatt er eingin leikari nú eftir frá liðnum, sum flutti upp í 2010.

19 ára gamli Óli Ey. Poulsen hevur valt at royna eydnuna í 1.deild í eini roynd at koma fyri seg eftir skaða, sum hevur vart í tvey ár. Óli spældi fyrsta dystin í landskappingini í 2019 við skaða, men annars skulu vit aftur til 2018 fyri at finna hansara síðstu dystir. Kemur Óli fyri seg frá skaðanum, so er ikki óhugsandi, at hann aftur verður á besta liðnum.

25 ára gamli Patrik Johannesen spælir neyvan við KÍ ella í føroyskum fótbólti í 2021. Hann hevur gjørt sáttmála við Egersund í triðbestu norsku deildini.

 

Frágongd

Frágongdin av leikarum sum høvdu sáttmála við KÍ uppá okkurt tíðspunkt í 2020 er sostatt hendan:

David Skrbec

Ólavur Niclassen

Steinbjørn Olsen

Lukasz Jarosinski

Ole Erik Midtskogen

Ísak Simonsen

Patrik Johannesen

Abubakar Ibrahim Aliyu

Alessio Hyseni

Gulak Jacobsen

Óli Ey. Poulsen

Meinhardt P. Joensen

Sebastian Avanzini

Av hesum kann so nevnast, at fleiri leikarar spældu lítlan ella ongan leiklut. Sebastian, Meinhardt, Óli, Gulak, Abubakar og David spældu einki ella undir 200 minuttir.

 

 

Tilgongd

Higartil hevur KÍ fingið tilgongd av fimm leikarum.

Árni Frederiksberg (kantur)

Mathias Rosenørn (málverji)

Bob Sumareh (álopsleikari)

Jasper Van Der Heyden (kantur)

Ivar Sollie Rønning (álopsleikari)

KÍ hevur ikki fingið sín síðsta styrk enn og okkurt bendur á, at ein styrkur, sum kemur afturat, verður ein sentralur miðvallarleikari. Á hesum plássi hevur KÍ ikki funnið nakran avloysara enn fyri Simen Sandmæl og Semir Hadzibulic, sum spældu árini 2016-2019. Í 2020 vóru Alessio Hyseni og David Skrbec ''keyptir'' til hetta pláss, men uttan at teir vístu seg at gera mun. KÍ endaði tí við at brúka miðverjan Deni Pavlovic á sentrala miðvøllinum. Deni spældi fyri tað mesta væl, men skapandi spælið frameftir vøllinum manglaði, tá ein verjuleikari røkti annað av plássunum sentralt. KÍ skoraði fleiri mál í kappingarárinum enn nakrantíð fyrr, men í topp 4 dystunum skoraði KÍ 25 % færri mál (12 í mun til 16 í 2019).

 

 

Fyribils eingir nýggir lokalir leikarar

Norðlýsið fylgdi onkrari venjing hesa fyrstu vikuna. Flestu árini hava vit sæð, at ungir lokalir leikarar eru partur av hópinum fyrstu tíðina, ið ikki vóru við árið frammanundan. Men í hópinum sum hevur vant hesa fyrstu vikuna hava bara sáttmálaleikarar verið við. Skaðar, sóttarhald og korona raktu hópin fyrstu dagarnar, og tað ger, at til fyrstu venjingardystirnir koma vit kanska at síggja, at 1.deildarleikarar koma at ''hjálpa'' til. Tað kann eisini lata møguleikan upp fyri, at onkur leikari fer at sannføra og koma í besta hópin.

 

Vinstri bakkur og sentrali miðvøllurin

KÍ sær út á pappírinum at vera væl mannað á flestu plássum, har kapping eisini er um flest øll pláss. Men á tveimum plássum er spurnartekin og samstundis spenningur, hvussu tað fer at vera loyst, um ikki ein ella tveir møguligir nýggir leikarar loysa hetta.

Á vinstra bakki er stór útskifting farin fram. Taka vit FM-árið í 2019, so spældu Ísak Simonsen, Ólavur Niclassen og Óli Ey. Poulsen á vinstra bakki. Allir hesir eru burtur nú. Seinna part av 2019 spældi Jesper Brinck, sum er høgrabeintur miðverji, fyri tað mesta á hesum plássi. Tað sá út til at rigga væl til Evropadystir og í onkrum av toppdystunum, men tóktist ikki tað optimala, tá KÍ skuldi mynda dystirnar við álopsspæli, har bakkarnir vanliga hava verið týdningarmiklir. Jesper Brinck hevur drigist við ein skaða fyrstu vikuna, so helst koma vit at síggja fleiri aðrar leikarar fáa møguleikan at vísa seg á hesum plássi. Ein møguleiki er Dávid Langgaard, sum er væl fyri við styrki í báðum beinum og sum hevur roynir á báðum bakkunum.

Á sentrala miðvøllinum verður spurningurin, hvør fer at at spæla viðsíðuna av Jákup B. Andreasen, um leikskipanin 4-4-2 verður brúkt, sum hon sum oftast hevur verið síðstu tvey árini. Áðrenn 19. sáttmálin er komin, so tykjast mest uppløgdu møguleikarnir at vera Deni Pavlovic (verjukend útgáva) ella Jóannes Bjartalíð (álopskend útgáva).

 

 

18 sáttmálar

KÍ hevur 18 sáttmálar í løtuni:

Málverjar:

Kristian Joensen

Mathias Rosenørn

 

 

Verjuleikarar:

Jóannes K. Danielsen

Børge Petersen

Heini Vatnsdal

Odmar Færø

Jesper Brinck

Deni Pavlovic

Dávid Langgaard

 

 

Miðvallarleikarar:

Jákup B. Andreasen

Jasper Van Der Heyden

Boris Dosljak

Jonn Johannessen

Árni Frederiksberg

Jóannes Bjartalíð

 

Álopsleikarar:

Bob Sumareh

Ivar Sollie Rønning

Páll A. Klettskarð

 

 

Venjingardystur leygardagin á Svangaskarði

Leygardagin 16. januar verður eftir ætlan fyrsti venjingardystur í VFF Kup, sum koyrir komandi seks vikurnar. KÍ møtir uppflytarunum B68 á Svangaskarði kl. 12.00. Har fara vit at síggja fyrstu ábendingarnar um, hvørjar loysnir kanska vera til ivasomu plássini og hvørjir leikarar eru væl fyri í ár.