Føroyar vunnu uppá góðan seinna hálvleik móti Moldova
Føroyar vóru betra liðið eftir hálvleik og avgjørdu tá dystin.
Í fyrra hálvleiki hevði Moldova munin, men fáir stórir málmøguleikar vóru.
Áðrenn miðjan seinna hálvleik skifti Føroyar frá 4-5-1 leikskipan til 4-4-2 og stutt eftir var 2-0. Fyrst Klæmint A. Olsen og síðani Heini Vatnsdal. Moldova fekk minkað um munin eftir samskiftisstrupulleikar í føroysku verjuni.
2-1 gjørdist úrslitið og tað gjørdist sostatt ein góður endi uppá hetta landsliðsumfarið. Nú eru fýra dystir eftir seinni í ár, har mótstøðuliðini eru stórfavorittar. Tað ger tað ikki minni spennandi, um okkurt óvæntað stig kann leggjast afturat teimum fýra, ið øll eru komin móti Moldova.
KÍ-miðverjarnir Odmar Færø og Heini Vatnsdal spældu ein góðan dyst, meðan innskifti Jákup B. Andreasen lyfti føroyska liðið og var við í báðum málunum hjá Føroyum.