Byggingin varð boðin út í vár. Tað vísti seg tó, tá ið tilboðini komu inn, at verkætlanin gjørdist dýrari enn mett og tí varð útboðið tikið aftur, sum eg havi skilt. 

Eg havi ikki kunnleika til, hvussu nógv dýrari enn mett verkætlanin gjørdist, men givið er, at ein kann vænta ein ávísan prísvøkstur av eini verkætlan, ið arbeitt hevur verið við yvir eitt longri áramál. 

Hetta eigur tó ikki at merkja, at verkætlanin verður slept ella løgd á ís í meira enn eitt ár. Vanliga verður arbeitt víðari fyri at finna aðrar loysnir, og fái eg meg ikki at trúgva, at hetta ikki eisini er so við Húsarhaldsskúlanum. Tað, sum skelkar og undrar er, at í framløgdu fíggjarætlanini fyri komandi ár verður staðfest : “Eingin játtan er tískil til endamálið í 2022.”

Hetta kann ikki vera rætt. Eg vóni ikki, at samgongutingmenn fara at samtykkja eina fíggjarlóg við einum nulli í játtan til Húsarhaldsskúlan, tí so kann ein óttast fyri, at verkætlanin fer fyri bakka. 

Eg vil hervið veita samgongutingmonnum mín fulla stuðul at fáa byggingina av Húsarhaldsskúlanum setta á fíggjarlógina aftur, so farast kann undir at byggja í komandi ári.