Tá Team Klaksvík møtir StÍF, so hava hesi síðstu árini víst, at tað ofta gongst júst øvugt av tí, sum er væntandi. Hesaferð var Team Klaksvík favorittur á heimavølli, men tað løgdu strandingar lítið í. StÍF hevði leiðsluna nærum allan dystin og var seinna part av seinna hálvleiki altíð á odda við í minsta lagi tveimum málum.

Neistin vitjar

Hóast Team Klaksvík tapti, so varðveitti Team Klaksvík oddasessin, tí KÍF spældi javnleik. Hesaferð hevur Team Klaksvík, sum hevur fimm stig fyri fýra dystir, aftur heimavøll, nú oddasessurin skal verjast. Neistin, ið hevur tvey stig fyri tríggjar dystir, vitjar í Klaksvík. Liðini møttust í 1. umfari, tá Team Klaksvík vann við einum máli í spennandi dysti. Team Klaksvík hevur lutfalsliga ofta fingið góð úrslit móti Neistanum.

Dysturin í Klaksvíkar Badmintonhøll byrjar leygardagin kl. 16.00.