Veðrið um vikuskiftið
Hann fer at liggja av vestri allan dag. Í nátt gongur hann upp í norðan, út á dagin í morgin niður í eystan, og har fer hann at liggja restina til sunnukvøldið. Vindurin fer at minka út á seinnapartin; í morgin og sunnudagin er lítil vindur.
Í morgun eru vit í klemmu ímillum eitt hátrýst yvir Stórabretlandi og eitt lágtrýst yvir Norska havi. Lágtrýstið fer sín veg eystureftir seinni í dag, meðan hátrýstið stendur eftir og fer at geva okkum lítlan vind restina av vikuskiftinum.
Meira ítøkiligt, so siga veðurstøðirnar hjá Veðurstovu Føroya frá 10 til 15 m/s av vestri í morgun. Turt kring næstan alt landið, og hitin liggur um 8 stig.
Seint seinnapartin fara ælingar at reka inn yvir landið, og vindurin fer at minka. Seint í kvøld fer hann at ganga upp ímóti norði. Á midnátt eru 5 m/s av vesturhallum norði og turt.
Í nátt eru undir 5 m/s av vesturhallari norðurætt og ælaveður, men út á fyrrapartin í morgin gongur hann eysturum til landnyrðing-norðan. Framvegis lítil vindur og ælaveður.
Seinnapartin í morgin fer ætt at flyta seg niðureftir – komin niður í landnyrðing um nátturðatíð. Vindferðin framvegis um 5 m/s ella minni, og tað er yvirhøvur turt. Hitin í morgin fer at liggja um 5 til 8 stig.
Sunnunáttina gongur hann niður ímóti eystri- vindferðin enn tann sama, um 5 m/s, og tað er yvirhøvur turt. Seinnapartin gongur hann niður um eystan til landsynning-eystan. Vindurin fer at veksa um kvøldið. Á midnátt eru 13 til 18 m/s. Hitin sunnudagin fer at liggja um 6 til 9 stig.